- Inés Soria, Justizia eta Giza Eskubideen Saileko Departamentuko Politikako aholkulariak, Justizia Errestauratiboari eta Bizikidetzari buruzko I. Nazioarteko Foroan parte hartu du Quiton
Inés Soria, Justizia eta Giza Eskubideen Saileko Departamentuko Politikako aholkulariak, Ekuadorren aurkeztu du Eusko Jaurlaritzak justizia errestauratiboaren alde egiten duen apustua, funtsezko politika publiko gisa. Quiton egiten ari den Justizia Errestauratiboari eta Bizikidetzari buruzko I. Nazioarteko Foroan parte hartzen ari den Soriak nabarmendu du María Jesús San Josék zuzentzen duen Sailak alor horretan ideia argi batekin lan egiten duela: biktimak eta haien erreparazioa erdigunean jartzea.
Justizia Errestauratiboaren arloko arau-esparruari buruzko mahai-inguru batean, Inés Soriak azaldu du Euskadik ia bi hamarkadako esperientzia duela bitartekaritza programetan eta praktika errestauratiboetan. Ibilbide hori 2007an hasi zen, eta 2018an urrats erabakigarria eman zen: erantzukizuna hartzea, eragindako kaltea konpontzea eta inplikatutako pertsonei banakako arreta eskaintzea helburu dituzten tresna errestauratibo berriak txertatu ziren.
Horren harira, Justizia eta Giza Eskubideen Sailak Justizia Errestauratiboaren eredu egonkor bat sendotzeko duen konpromisoa nabarmendu du. Konpromiso hori 2022-2025 aldirako Justizia Errestauratiboaren Estrategiarekin batera abiatu zen, eta orain bultzada berri bat hartu du Justizia Errestauratiboaren Lege Aurreproiektuarekin; izan ere, aurretiazko onarpena jaso ondoren, izapidetze prozesua hasi da dagoeneko.
Soriak azaldu du etorkizuneko arauak Justizia Errestauratiboaren Euskal Eredua definituko duela, sistema publiko, doako, unibertsal eta eskuragarri gisa. Eredua borondatezkotasunaren, konfidentzialtasunaren, inpartzialtasunaren, ekitatearen eta kalitatearen printzipioetan oinarrituko da. Era berean, Euskal Justizia Errestauratiboaren Sistemaren antolaketa arautuko du, eta biktimen arreta, justizia errestauratiboa eta zigor-betearazpena jorratzen dituzten zerbitzu publikoen arteko koordinazioa indartuko du.
Bere hitzaldian, aholkulariak azpimarratu du “justizia errestauratiboak ez du zigor-prozesua ordezkatzen; aitzitik, osatu egiten du, kaltea konpontzeko, erantzukizuna hartzeko eta biktimak zein delituaren egileak laguntzeko guneak txertatzen ditu”. Zentzu horretan, justizia-eredu baten alde egin du, zigor-prozesuaren berezko bermeak eta ikuspegi errestauratiboa uztartuko dituena, hau da, biktimak politika publikoen erdigunean kokatuko dituena eta gizarteratzea nahiz delituak berriro ez egitea sustatuko dituena.
Soriak azaldu du, halaber, Saila lege-aurreproiektuaren izapidetzearekin jarraitzen duen bitartean garatzen ari den zenbait jarduera. Horien artean daude Biktimari Arreta Integrala Emateko Zerbitzua indartzea, Justiziarekin lankidetzan aritzen diren zerbitzuen arteko koordinazioa hobetzea, profesionalentzako prestakuntza espezializatua sustatzea, irizpide errestauratiboak eremu judizialean txertatzea eta hizkera juridiko argiago eta eskuragarriago baten erabilera bultzatzea.
Justizia Errestauratiboari eta Bizikidetzari buruzko I. Nazioarteko Foroa hainbat herrialdetako profesionalak eta erakundeak bildu ditu Quiton, justizia errestauratiboaren, giza eskubideen eta bizikidetzaren eraikuntzaren arloan esperientziak partekatzeko eta nazioarteko lankidetza indartzeko.